Ra’iisul Wasaare Saacid oo sheegay Wafdi in loo dirayo Kismaayo
Iyadoo uu wali muran ka taaganyahay Maamulka la doonayo in loo sameeyo Magaalada Kismaayo ee xarunta gobolka Jubbada hoose ayaa waxaa Raiisul Wasaaraha soomaaliya Mudane Cabdi Faarax Shirdoon “Saacid” uu sheegay wafdi balaaran in loo diri doono Magaalada Kismaayo.
R/wasaaraha Xukuumadda Federaalka Soomaaliya Mudane Cabdi Faarax Shirdoon ‘’Saacid’’ ayaa ka hadlay siyaasadda dowladda ee dhinaca amniga iyo arrimo kale, isagoo sheegay in dhawaan la hirgalin doono dhameystirka agabka ciidammada Qalabka Sida, isla markaana dib loo howlgalin doono xeryihii ciidammada, si guul looga gaaro horumarrinta, tayada Ciidammada Qalabka Sida.
Sidoo kale Ra’iisul wasaare Saacid ayaa hambalyo u diray ciidamada dowladda Federaalka ee howlgalka ka wada gobollada dalka ee cadowga ka ilaalinaya shacbiga, waxa uu sidoo bogaadiyay Ciidammada ammaanka dowladda ee magaalada Kismaayo, dowladda Soomaaliyeedna ay isu diyaarneyso xasilinta magaaladaasi, wefdi ka socda dowladda Soomaaliyana uu ku sii jeedo si xal kama dambeys ah looga gaaro halkaasi.
