Madaxwayne Xassan Sheekh iyo Madaxwaynaha Turkiga oo shir Jaraa’id ku qabtay Ankara
Madaxweynaha dalka Turkiga Abdullah Gul ayaa sheegay in dowladda iyo hay’adaha Turkiga ay sii kordhin doonaan Barnaamijyada horumarinta iyo gargaarka bini’aadanimo ee ay ka fulinayaan Soomaaliya.
Abdullah Gul ayaa hadalkan ka sheegay shir jaraa’id oo ay si wadajir ah u qabteen isaga iyo Madaxweynaha Soomaaliya oo shalay ku kulmay magaalada Ankara ee Turkiga.
Madaxweynaha Turkiga ayaa saxaafadda u sheegay in kulankii uu la qaatay Madaxweyne Xasan Sheekh Maxamuud uu ku dhammaaday mid wax ku ool ah oo ay ka soo baxeen waxyaabo muhiim ah oo la taaban karo.
Madaxweynaha Soomaaliya Prof.Xasan Sheekh Maxamuud ayaa sheegay in kulanka looga arinsanaye xoojinta iskaashiga ammaanka ee labada dal iyo sidii dowladda Turkiga ay kor ugu qaadi lahayd mashaariicda horumarineed ee ay ka geysaneyso Soomaaliya.
Waxaa lagu wadaa in Madaxweyne Xasan Sheekh Maxamuud maanta la kulmo Raysul wasaaraha Turkiga Recep Tayip Erdogan iyo saraakiil sare oo ka tirsan dowladda Turkiga.
Turkiga wuxuu ka mid yahay dalal dhowr ah oo Soomaaliya u soo gurmaday xilligii abaartii sanadkii hore, iyadoo Raysul wasaare Recep Dayib Erdogan iyo wafdi ballaaran oo uu hoggaaminayo ay dabayaaqadii sannadkii hore booqdeen magaalada Muqdisho.
