Shacabka Kismaayo oo Soo dhaweeyay duulimaadka Cusub ee Muqdisho iyo Kismaayo.
Iyadoo in mudaa aysan ka dhoofin wax diyaarado ah garoonka Diyaaradaha ee Magaalada Kismaayo ee xarunta gobolka Jubbada hoose ayaa waxaa maanta halkasi ka qaaday dad rakaab ah oo u socday Muqdisho, diyaaradaha Rakaabka qaada ee ka dhex shaqeeya gudaha Soomaaliya.
Qaar kamid ah dadkii maanta u dhoofay Magaalada Muqdisho oo ka horta intii aysan kasoo anba bixin garoonka Kismaayo la hadlay Warbaahinta ayaa sheegay in ay aad ugu faraxsanyihiin maanta in ay helaan diyaarad ka qaada Kismaayo isla markaasina gaysa Magaalada Muqdisho.
Nabadoon Aadan Gulled oo kamid ah dadkii Muqdisho usoo anba baxay ayaa u sheegay Warbaahinta farxad in ay tahay markale sanado badan kadib in ay helaan diyaarad Rakaab oo qaada dadka shacabka ah.
Magaalada Kismaayo ee xarunta gobolka Jubbada hoose tan iyo Markii Kooxda Al-shabaab oo in mudaa gacanta ku haysay laga faramaroojiyay, ayaa waxaa maalin walba magaalada Kismaayo soo gaarayay Wufuud ka socota Caalamka iyo sidoo kale qurba joog ayaguna deegaanka u dhashay.
Sikastaba Magaalada Kismaayo ayaa u muuqata mid kasoo gabanaysa dhaawacii kasoo gaaray Kooxda Al-shabaab intii ay ku sugnaayeen gudaha Magaalada Kismaayo, wallow mararka qaar ay ka dhacaan dilal iyo falal kale oo amaanka lidi ku ah.
