Dhagayso: Gudoomiyaha Baarlamanka Jabuti oo Muqdisho soo gaaray
Magaalada Muqdisho ee caasimada dalka Soomaaliya waxaa maanta soo gaaray wafdi uu hogaaminayo Guddoomiyaha Baarlamaanka dalka Jabuuti.
Maxamed Cusmaan Sheekh Jawaari Guddoomiyaha Baarlamaanka dalka Soomaaliya ayaa dhankiisa sheegay inuu aad ugu faraxsan yahay in maanta Magaalada Muqdisho uu soo gaaro Guddoomiyaha Baarlamaanka dalka Jabuuti.
Intaasi kadib ayaa Guddoomiyaha Baarlamaanka dalka Jabuuti waxaa loo galbiyay Aqalka Baarlamaanka dalka Soomaaliya halkaasi oo uu kula hadlay Xildhibaanada Baarlamaanka Soomaaliya.
Guddoomiyaha Baarlamaanka dalka Jabuuti ayaa sheegay in Xildhibaanada ay yihiin wakiilo matalaya shacabka Soomaaliyeed loona baahan yahay mar waliba inay ka fekeraan shacabkooda Soomaaliyeed.
Waa markii ugu horeysay ee Gudoomiyaha Baarlamaanka dalka Jabuuti uu soo gaaro Magaalada Muqdisho islamarkaana uu hortago Baarlamaanka Soomaaliya.
Wafdigii ka socday dowladda Jabuuti ee maanta soo gaaray magaalada Muqdisho ayaa ka qeyb galay kulankii maanta ka dhacay xarunta golaha shacabka ee Muqdisho waxaana kulanka baarlamanka soo xaadiray 182 mudane, iyadoona ajandaha kulanka uu ahaa sidii loo soo dhaweyn lahaa mas’uuliyiinta ka socotay dowladda Jabuuti.
Kulankii maanta oo uu shir guddoominayay afhayeenka baarlamanka Soomaaliya ayaa hadal uu jeediyay uga mahad celiyay shacabka iyo dowladda Jabuuti garab istaaga ay dowladda Soomaaliya la garab taagan yihiin.
halkaan ka dhagayso Guddoomiyaha Baarlamanka Jabuuti
Sidoo kale Gudoomiyaha baarlamaanka jabuuti Idiris Arnaa’uud Cali ayaa isaguna u jeediyay mudanayasha hadallo u badan guubaabo iyo mahadcelin waxa uunu ku baraarujiyay xubnaha golaha shcabka in ay ka shaqeeyaan wax walba oo lagu hormarinayo dalka Soomaaliya.
Khudbadi afhayeen barlamanka kadib waxaa ay xildhibanadii kasocday dowladda Jabuuti hadiyado ay ugu talageen gudoonsiiyeen xildhibaanada baarlamanka Soomaaliya.
Guddoomiyaha baarlamanka jabuuti iyo wafdiga uu hogaaminayo ayaa maalmaha soo socda joogi doono magaalada Muqdisho si ay ugu kuur galaan xaalada wadanka Soomaaliya waana wafdiga ugu horeeyay ee baarlaman Afrikaan ah ka socda oo yimaado Muqdisho islamarkana lakulmo baarlamanka dhigooda ah ee Soomaaliya.
Dowladda Jabuuti ayaa dalka Soomaaliya waxaa ka jooga ciidamo ku howlgala magaca AMISOM kuwaasi oo ku sugan Magaalada Beladweyne ee xarunta Gobalkaasi Hiiraan iyo Magaalada Muqdisho.
